भक्तपूर । नेपाली कांग्रेसको भ्रातृ संस्थाहरूले भक्तपुरमा ओली सरकारविरुद्ध राँके जुलुस प्रदर्शन गरेको छ ।
भक्तपुरको बालकोटमा कांग्रेसका भ्रातृ संस्थाहरूले साँझ ओलीविरुद्ध राँके जुलुस प्रदर्शन गरेका हुन् । उनीहरूले ओलीको असंवैधानिक र अलोकतान्त्रिक कदमका विरुद्ध नारावाजी गरेको नेपाल तरुण दल भक्तपुरका सदस्य राजु पुरीले जानकारी दिए ।
राँके जुलुस प्रदर्शनमा नेपाली कांग्रेस भक्तपुरका सभापति दुर्लभ थापा, नेपाल तरुण दल भक्तपुरका अध्यक्ष राजु थापासहितका नेता कार्यकर्ताहरूको सहभागिता रहेको थियो ।
सभालाई सम्बोधन गर्ने नेताहरूले कम्युनिस्टहरूको पतन शुरु भएको भन्दै अबको निर्वाचनमा जनताले कांग्रेसलाई साथ दिने बताए ।
प्रधानमन्त्री ओलीको घर भक्तपुरको बालकोटमा रहेको छ । भक्तपुर कांग्रेस र भ्रातृ संस्थाहरूले ओलीलाई सचेत गराउन बालकोटमा राँके जुलुस प्रदर्शन गरेको तरुण दलका सदस्य पुरीले बताएका छन् ।
