गोल्डेन ह्याण्डसेकबाट चाँगुनारायणका ३७ शिक्षक सम्मानित

0
504

भक्तपुर । चाँगुनारायण नगरपालिकाले सेवा निवृत्त गर्न चाहने शिक्षकलाई सम्मान गरेको छ । पालिकाले गोल्डेन ह्याण्डचेकमार्फत सेवाबाट अवकास लिन चाहने सामुदायिक विद्यालयका शिक्षकलाई नगर शिक्षा शाखाको आयोजनामा सम्मान गरेको छ ।

सम्मानमा नगरपालिकाले शिक्षकलाई एक लाखदेखि चार लाखसम्म नगद र प्रशंसापत्र वितरण गरिएको शिक्षा शाखाले जनाएको छ । शिक्षा शाखाका प्रमुख वीरबहादुर खड्काका अनुसार नगरभित्रका सामुदायिक विद्यालयमा सेवा दिँदै आएका शिक्षकलाई गोल्डेक ह्याण्डचेकको व्यवस्था गरिएको र सोही सुविधामार्फत सेवाबाट अवकास लिन चाहने शिक्षकलाई सम्मान गरिएको हो । उनले नगरभित्रका सामुदायिक विद्यालयबाट ३७ जना शिक्षकलाई सम्मान गरेको बताए ।

नगरपालिकाका नगरप्रमुख सोमप्रसाद मिश्रले नयाँ पुस्तालाई रोजगारीको अवसर दिन र पुराना पुस्ताका शिक्षकलाई सम्मानका साथ विदाई गर्नको लागि सो कार्यक्रमको व्यवस्था गरिएको बताए । उनका अनुसार शिक्षा समयानुसार परिवर्तन हुनेपर्ने र सोही अनुरुप नयाँ पुस्तामा नयाँ प्रविधिको पहुँच हुने, नयाँ शिक्षा हुने भएकोले उनीहरुलाई शिक्षा क्षेत्रमा ल्याउनको लागि पालिकाले सो कार्यक्रमको व्यवस्था गरिएको हो । उनले शिक्षक समाजका सम्मानजनक व्यक्तित्व भएकोले अवकासपछि पनि समाजमा सामाजिक र मानवीय सेवा गर्न अनुरोध गरे । कार्यक्रमको लागि पालिकाले आन्तरिक स्रोतमार्फत १ करोड २५ लाख ६० हजार रुपैयाको बजेट व्यवस्था गरिएको मिश्रले बताए ।

नगरपालिकाका प्रमुख प्रशासकीय अग्निप्रसाद अधिकारीले अवकास लिएका शिक्षकले सेवाबाट अवकास लिएता पनि नगरपालिका र समाजमा आवश्यकता अनुसार सल्लाहसुझाव प्राप्त हुने विश्वास व्यक्त गरे ।

नगरपालिकाले दिएको सो सम्मानले शिक्षकहरुले प्रशंसा गरेका छन् । पञ्चकन्या माध्यमिक विद्यालयका संस्थापक प्रधानाध्यापक तथा शिक्षक सन्तराम दुलालले नगरपालिकाले दिएको सम्मानबाट आफू खुसी भएको बताए । उनले विद्यालयको स्थापनादेखि हालसम्म शिक्षण पेशासँगै विद्यालयको शैक्षिक तथा भौतिक पक्षको विकासको लागि सधैँ लागिपरेको र सोको मूल्यांकन नगरपालिकाले गरेको बताए । उनले पालिकाले ल्याएको कार्यक्रम राम्रो रहेको र अवकास लिएको शिक्षकको स्थानमा चाँडै नयाँ पुस्ताका शिक्षकहरुको व्यवस्था गर्न पालिकासँग आग्रह गरे ।