ख्वप अस्पतालमा अनुगमन

0
338

२०७८ माघ २१ गते, शुक्रबार । प्रदेश सरकार स्वास्थ्य निर्देशनालयका वरिष्ठ स्वास्थ्य प्रशासक डा. नरेन्द्रकुमार झाको नेतृत्वमा आउनुभएको अनुगमन टोलीले शुक्रबार भक्तपुर नगरपालिकाबाट सञ्चालित ख्वप अस्पतालको स्थलगत अनुगमन गरेको छ ।
भक्तपुर नगरपालिकाका प्रमुख एवम् ख्वप अस्पताल सञ्चालक समितिका अध्यक्ष सुनिल प्रजापतिले अनुगमन टोलीलाई ख्वप अस्पतालमा स्वागत गर्नुभई अस्पतालबाट प्रवाहित सेवा तथा सुविधा र अस्पतालको अवस्थाबारे विस्तृतमा अवगत गराउनुभयो ।
नगर प्रमुख प्रजापतिले जनताको माग र आवश्यकताअनुसार नगरपालिकाले सुविधासम्पन्न ख्वप अस्पताल सञ्चालनमा ल्याएको बताउनुहुँदै ख्वप अस्पताललाई स्तरोन्नति गर्दै १०० शैय्या क्षमताको अस्पताल सञ्चालनको लागि आवश्यक सहयोगको लागि अनुरोध गर्नुभयो ।
अस्पतालका बिरामीहरूलाई २४ सै घण्टा इमर्जेन्सी सेवा, ल्याब, एक्स रे र फार्मेसी सेवा, स्त्री रोग, जनरल सर्जरी, बाल रोग, हाडजोर्नीलगायतका सेवाहरू सञ्चालनमा रहेको जानकारी गराउनुभयो ।
अनुगमनका क्रममा प्रदेश सरकार स्वास्थ्य निर्देशनालयका वरिष्ठ स्वास्थ्य प्रशासक डा. झाले ख्वप अस्पतालको भौतिक पूर्वाधार नेपाल सरकारले तोकेको मापदण्डअनुरुप नै भइरहेको पाइएको बताउनुभयो ।
उहाँले नगरपालिकाबाट सञ्चालित ख्वप अस्पताल अनुकरणीय, अतुलनीय र उदाहरणीय भएको बताउनुहुँदै शिक्षा, स्वास्थ्य तथा विकास निर्माणका गतिविधिहरूमा अन्य स्थानीय तहले भक्तपुर नपाबाट सिक्नुपर्ने बताउनुभयो ।
उहाँले ख्वप अस्पतालको भौतिक संरचना अपांगमैत्री हुनुपर्ने र जनतालाई सहज रुपमा स्तरीय स्वास्थ्य सेवा उपलब्ध गराउन अस्पतालले विशेष ध्यान दिनुपर्नेमा जोड दिनुभयो ।
टोलीले निर्माणाधीन ख्वप अस्पताल, ब्रम्हायणीस्थित ख्वप अस्पताल कोभिड युनिट, छात्ती पुनःस्थापना केन्द्रको समेत स्थलगत निरीक्षण गरेको थियो ।
अनुगमन टोलीमा प्रदेश सरकार स्वास्थ्य निर्देशनालयका वरिष्ठ नर्सिङ प्रशासक साबित्रीकुमारी पौडेल, भक्तपुर अस्पतालका नर्सिङ अधिकृत रोशनी श्रेष्ठ, स्वास्थ्य निर्देशनालयका रेडियोलोजिष्ट डा. रुपेन्द्र खड्की, ल्याब टेक्निसियन इन्चार्ज सुशिल आचार्यको उपस्थिति रहेको थियो ।